Posts Tagged ‘ Wejrowò ’

Wanoga pò miesce

Pùdzema so na wanogã
pò kòchónym mòjim gardze
– ju Cë gôdóm, co tam bãdze.

W mòjim miesce Cë pòkôżã
skrëté stawë w stôrich lasach
z bôjków môle, w chërne wierzã
ë jich mòc, jesz w naszich czasach

Tej pùdzema na wanogã
pò nôswiãtszich górach swiata
pòkùtników pòznac dargã
czerwònégò wòniã kwiata

Biôłą strëgą òd zôczątkù
za załużcą bãdzema szlë
bë na sztucek wlézc do parkù
ë òbôczëc zómkù zalë

Tedë jidąc prostą stegną
do Francëszków so zańdzema
kòl Matińczi nodżi klãkną
a tej w krëptë jesz zazdrzëma

Do radnicë stôrim miastã
jesz historie përznã pòczëc
òbôczëma kòlegiatã
w cëszã swiatu jidze ùcec

Na deptakù nańdzesz krómë
a za rońdã – kòscół, szkòła,
w parkù tank, a tej ùzdrzëmë
filharmòniã, banë kòła…

Ë ju kùńczi sã wanoga
pò kòchónym mòjim gardze
– Wej niejeden jesz tu przińdze.

Wanoga pò miesce” abò 17.2.11

Powiew Weny – pòkònkùrsowi lëteracczi dokôz.

Powiew Weny

Ùkôza sã pùblikacëjô “Powiew Weny” pò kònkursu, chtëren òrganizowóny béł bez Miejską ë Pòwiatową Pùbliczną Bibliotekã m. A. Majkòwsczégò we Wejrowie w 2010 rokù.
W pùblikacëji nalézemë téż trzë kaszëbsczé akceńtë – wiérztë “Wspòmink pierszi” , “Rómk mùzykańt” ë “Pòrenk na gbùrstwie” w. Tomôsza Fópczi, chtërnyma znóny na Kaszëbach ùtwórca dobéł II môl w kategorie “pòezjô dlô dozdrzeniałëch”, a téż pòwiôstka “Ùbëtk” mòjégò aùtórstwa (III môl w kategorie “proza dlô dozdrzeniałëch”).
Trzecym kaszëbsczim akceńtã je debiut Móńczi Lëdzbarsczi z Szëmôłda, chtërna wiérztama “Zaùłk” , “***” ë “***” dobëła I môl w kategorie “pòezjô dlô młodzeznë”.
Dokôz mòżna òbôczëc na starnie wëdzału kùlturë wejrowsczi radnicëhttp://zobaczwejherowo.pl/pdf/wena-2011.pdf

This website uses cookies to offer you the best experience online. By continuing to use our website, you agree to the use of cookies.